Ultrasəslə qiymətləndirilən vəziyyət
Venoz tromboz və dopler müayinəsi
Venoz tromboz venada qan laxtasının (trombun) əmələ gəlməsidir. Ayaqda birtərəfli şişkinlik, ağrı və qızartı ilə özünü göstərə bilər. Dopler USM trombu birbaşa göstərə bilir. Dərin vena trombozu trombun ağciyərə getməsi riskinə görə təcili qiymətləndirmə və müalicə tələb edir.
Praktikadan (anonim)
- Baldır nahiyəsində ağrı və şişkinlik ilə gələn pasiyentdə səthi venada tromb aşkarlanıb.
- Qaraciyər xəstəliyi olan pasiyentdə qapı venasında tromb aşkarlanıb.
- Böyrək müayinəsinə gələn, üzündə şişkinlik olan pasiyentdə boyun venasında tromb aşkarlanıb, sonradan KT ilə təsdiqlənib.
Ümumi tibbi məlumat
Növləri
- Səthi vena trombozu: dəri altındakı venada ağrılı, bərk «kəndir» kimi hiss olunur. Bəzən dərin venalara yayıla bilər, ona görə dopler ilə dərin venalar da yoxlanılır.
- Qapı venası trombozu: qaraciyərə qan gətirən venada tromb. Çox vaxt qaraciyər xəstəliyi fonunda olur və hepatoloqun nəzarəti tələb olunur.
- Boyun venası trombozu: nadirdir. Üz və boyunda şişkinliklə özünü göstərə bilər.
Nə vaxt təcili müraciət etməli?
Ayaqda şişkinlik ilə birlikdə təngnəfəslik və ya döş qəfəsində ağrı olarsa, dərhal 103-ə zəng edin.
Yenilənib: 02.10.2026