Ultrasəslə qiymətləndirilən vəziyyət
Öd daşları və öd kisəsi polipləri
Öd daşları öd kisəsində və ya öd axarlarında əmələ gələn bərk çöküntülərdir. USM öd kisəsi daşlarının əsas görüntüləmə üsuludur. Müayinəyə 4–6 saat ac gəlmək lazımdır. Polip öd kisəsinin divarından çıxan törəmədir. Nəzarət və ya əməliyyat qərarını ölçüsünə və xüsusiyyətlərinə görə həkim verir.
Praktikadan (anonim)
- Öd kisəsi əməliyyatından sonra ağrıları davam edən pasiyentdə ümumi öd axarında daş aşkarlanıb. Daş ERCP ilə çıxarılıb.
- Rayondan sancı ilə gələn pasiyentdə öd axarının aşağı hissəsini tıxayan daşlar aşkarlanıb və pasiyent cərraha yönləndirilib.
- Məktəbəqədər yaşda uşaqda öd kisəsi daşı.
Ümumi tibbi məlumat
Əlamətlər
- sağ qabırğaaltı nahiyədə, xüsusən yağlı yeməkdən sonra tutmaşəkilli ağrı (öd sancısı);
- ürəkbulanma;
- ağır hallarda sarılıq və hərarət.
Daşların çoxu uzun müddət əlamət vermir.
USM nəyi göstərir?
- daşların sayı və ölçüsü;
- öd kisəsinin divar qalınlığı;
- öd kisəsi ətrafında maye;
- öd axarlarının genişlənməsi.
Ümumi öd axarındakı (xoledox) daşlar həmişə görünmür. Lazım olduqda həkim MRT xolangioqrafiya və ya endoskopik müayinə təyin edə bilər.
Uşaqlarda
Uşaqlarda öd daşı nadirdir. Səbəbləri arasında hemolitik anemiyalar, bəzi dərmanlar və qısa bağırsaq sindromu var. Tapıldıqda uşaq qastroenteroloqu və hematoloqun qiymətləndirməsi tövsiyə olunur.
Nə vaxt təcili müraciət etməli?
Davamlı güclü ağrı, hərarət və ya sarılıq olarsa, təcili müraciət edin.
Yenilənib: 02.10.2026